Browsed by
Schlagwort: Bayerischer Tag

Bayern, des samma mia – jawoi!

Bayern, des samma mia – jawoi!

Griaß eich mitanand!

Da Dialekt-Dog is zwar scho a Wei´ her, der war nämlich am 21. Februar. Do war uns aba as Weda no z´koid, desweg´n hamma unser´n Bayrischen Motto-Dog einfach wia de letzten vier Moi auf´n Freitag vor de Pfingstferien g´legt. Und des war a fetz´n Gaudi – wia immer, wenn de SMV a guad´s Festl start!

Da Plakinger Josef und da Kolb Tobias aus der zehnten Klass hom im Vorfeld scho amoi ois, wos notwendig war, organisiert und plant. Des hamms a richtig guad hi´kriagt! A Woch vorher homma olle nomoi kurz g´schwitzt, wei do de Würschtl z´friah g´liefert worn san. Des war a ganz scheene Aufregung, ois do auf oamoi fünfhundert Boar Würscht im Lehrerzimmer g´standn san! Aber da Metzga hod sein Fehler ei´gseg´n und des Zeig sofort wieda obg´hoid. A kuarze Zeit lang homma scho befürcht, mia kriag´n de gleich´n Würscht a Woch später noamoi g´liefert, aba des homm´s a se dann doch ned traut.

Am 18. Mai hom in da Fria um hoiwa achte de SMVler as Arbat´n o´gfangt, damit des bairische Frühstück in der ersten Pause mit Wiener, Weiße und Brezn a wirklich fertig war. Wia ma´s aa auf de Fotos seng konn, war´s wieda amoi a zünftige Pause, de ma do am Scheiner g´habt  hom!

 

Trotzdem geht´s bei dem Dog ja an sich ned um´s Essen, sondern um de Bairische Tradition von unserer scheena Schui! Und wei des mittlerweile a jeda woaß, san aa an Haufa in bairischer Tracht kumma – d´Schüler grod so wia d´Lehra! Sogar an Unterricht hom a boar auf Boarisch g´hoitn, wos dann fia manche doch a weng a Fremdsprach´nunterricht war… Von de Lehra hom aa no zwoa Geburtstog g´habt an dem Tog, da is dann unser Aktion grod recht kumma!

B´sonders gfreit hod uns olle, dass sogar de neie Chefin im Dirndl kumma is! Mia hoffa, dass des aa fia de ander´n Lehra, de se jetz immer no a weng ziert hom, a bissl a Motivation für´s nächste Joar is, dass sa se aa in ihr Tracht werfa – mia von da SMV wern den „Dialekt-Dog“ oder „Motto-Dog“, wir´a am Scheiner hoaßt, auf olle Fälle wieda macha!

 

Fia de Ältern unter de Schüler is´ ja aa b´sonders schee, wei ma auf d´Nacht dann glei auf´s Pfingstvoiksfest geht und do aa den bairischen Teil von seine Lehra wieda trifft!

Oiso macht´ses guad, bis zum nächsten Joar,

eier SMV!

Hawe de Ehre!

Kolb, Plakinger; Badum